10. Dezember

APFENT


Da Apfent is de schenste Zeit vom Winta. De meist'n Leit ham im Winta a Gripp'n. Des is de mit'm Fiaba. Mia ham aa oane, aba de is mit Beleichtung und schreibt se mit K.

Drei Wocha bevor's Christkindl kimmt, stellt da Vatta de Kripp'n im Wohnzimma auf und mei kloane Schwesta und i derfa helfa. Vui Kripp'n san langweilig, aba de unsare net, wie mia ham "mords pfundige" Figur'n drin.

I hob amoi an Josef und as Christkindl auf'n Ofa gstellt, damit ses sche warm ham und dann wars eana z'hoaß.

As Christkindl is schwarz worn und an Josef hot's in lauta Trümma zrissn. A Fuaß vo eahm is in Platzltoag einegflog'n und es war koa schena Anblick. Mei Muatta hot mi gschimpft und gsogt, daß net amoi de Heilign vor meina Bledheit sicher san.

Wenn d'Maria ohne Mo und ohne Kind umanandasteht, schaugt des gor net guat aus. Aba i hob Gott sei Dank vui Figur'n in meina Spuikist'n und da Josef is jetzad da Donald Duck. Ois Christkindl woit i an Asterix hernemma, weil der ois oanziga so kloa is, daß a in Futtertrog neipaßt hätt.
Do hot mei Muatta g'sogt, daß ma doch koan Asterix ois Christkindl hernemma kannt, da war ja des vabrennte Christkindl no besser. Es is zwar schwarz, aba immahin no a Christkindl.

Hinta dem Christkindl stenga a Ochs, a Esl, a Nilpferd und a Brontosaurier. Des Nilpferd und den Saurier hob i neigstellt, weil da Ochs und da Esl warn ma alloa zlangweilig.
Links neba dem Stoi kemma grod de drei heiligen Kenig daher. Oa Kenig is am Papa im letztn Advent beim Putz'n obeg'fall'n und war "dodal" hi. Jetzad hamma nur no zwoa heilige Kenig und dafir no an heiligen Batman.

Normal ham de drei heiligen Kenig an Haufen Zeig für des Christkindl dabei, nämli Gold, Weihrauch und Püree oder so ähnlich. Vo de unsern hot oana anstatt Gold a Kaugummipapierl dabei, des glänzt aa sche. Da andere hot a Marlboro in da Hand, weil mia koan Weihrauch ham. Da heilige Batman hot a Pistoln dabei. Des ist zwar koa Gschenk für des Christkindl, aba damit konn a s'Christkindl vorm Saurier bschütz'n.

Hinta de drei Heiligen san a poar rothaitige Indianer und a kaasiga Engl. Dem Engl is da Fuaß obbrocha, drum hamman auf a Motorradl gsetzt, damit a se leichta duat. Mim Motorradl konn a fahrn, wenn a net grod fliagt.

Rechts neba dem Stoi hamma a Rotkäppchen higstellt. Sie hot a Pizza und drei Weizn für d'Oma dabei und reißt grod a Maroni oba. An Wolf hamma net, drum lurt a Bummal hintam Bam fiere als Ersatzwolf. Mehra steht net in unserer Kripp'n, aba des reicht in d'Haut nei.

Auf d'Nacht schoit'n mia d'Lampn o und dann is unsa Krippn erst so richtig sche. Mia sitz'n dann umanand und singa Liada vom Advent. Manche gfoin ma, aba de meistn san ma z'lusert. Mei Opa hot mia a Gedicht vom Advent glernt und des geht so:


"Apfent, Apfent, da Bärwurz brennt. Erst trinkst oan, dann zwoa, drei, vier, dann hautst de mit deim Hirn an d'Tür."
Obwoi des Gedicht recht sche is, hot d'Muatta gsogt, daß i mia des net merka derf.

Im Advent wird a bastelt. Mia ham a große Schüssl voi Nüß' und a kloane voi Goldstaub. Do drin wälz ma de Nüß, bis s goid'n san und as Christkindl hängts nachad an Christbam. Ma derf net fest schnaufa, wei da Goidstaub "dodal" leicht is und umanandafliagt, wenn ma neischnauft.

Oamoi hob i vorher a Niaßpulva neito und wia mei Vatta de erste Nuß drin gwälzt hot, hot a an Niaßerer do, daß'n grissn hot und nachad war sei Gsicht goid'n und de Nuß net. D'Muatta hot'n gschimpft und sie hot gsogt, daß a se dümma ogstellt ois wia de Kinda. Meim Vatta war des recht zwida und er hot nimma mitdo. Er hot gsogt, daß mit'm Goidstaub irgend epps net stimmt. Ich hob mi narrisch gfreit, weils ois mitnanda a recht a lustiga Adventsobnd war.


Kurz vor Weihnachtn miassn mia unsare Wunschzettel schreim. Mei Schwesta wünscht se meistens a Puppn oda so a Glump. I schreib vorsichthoiba glei mehra Sachan drauf und zum Schluß schreib i am Christkindl, daß einfach sovui kaffa, bis as Geld ausgeht.
Mei Muatta sogt, daß des a Unverschämtheit is und daß ma irgendwann des Christkindl übahaupt nix mehr bringt, weil i net bescheiden bin.Aba bis jetzt hob i imma wos kriagt.

Und wenn i groß bin und a Geld vadien, dann kaaf i mia selba wos und bin übahaupt net bescheidn. Dann ko se des Christkindl vo mia aus ärgern, weil dann is ma wurscht.


Bis ma schaugt, is da Advent vorbei und Weihnachtn aa und mim Johr geht's dahi. De Gschenka san auspackelt und ma kriagt bis Ostern nix mehr, hechstens, wenn ma vorher Geburtstog hot.

Aba oans is gwies:
Da Advent kimmt imma wieda.